زجلية تحت عنوان:
رهوط لبهوت ***
ؤ على المراة والراجل لعبوا سب سبوت
عماو لعينين.. .ؤ ركبوا على الجهل والحزة
لقلوب تمزقت ؤ ضاقت و تهدمت لبيوت
ؤ هما زادوا فيها مليحة ، البندير والركزة
لأسر تشتات ؤ تفرقت وكثار لفراق ؤ لبهوت
ؤ سمن الهرس اعلام زيرو تبلحيس والقفزة
لعلة داعت ... ؤ بنادم ولى عايش مشموت
ضحية لشياطين لوقت لي فيهم غير الهزة
قنوات الصرف الصحي ؤ لمخلوق لمشموت
افلام الكبث تدويخة والرخص وغابت العزة
اش درتي بالبلاد كاع ناسها ، فاتهم الفوت
غرقوا في لفقد وتقليد عاد دين اللات والعزا
لبيوت رابت ، ؤ انت مول لفتوى و لخطوط
ما زرعتي قمح ، غير زدتي لوقاحة الف نغزة
ردتيها غابة ، و لعقلية عامرة ديشي و روث
كلاب تمدن بالتغرير طبقوها بالدبزة ولغمزة
ؤ لجهلهم ردوا الشوك والمسخ طعام و قوت
رابت الرحمة والمودة خنقوها بصداع و دبزة
بين لمرأة والراجل داروا بلان ، ؤلفخ موقوت
خوات ديور ؤ لولاد ضاعوا ؤخرجوا بلا وزة
تزادت ضجة شقاق لفراق ؤطلاق فات لفوت
غرقت الاسرة في الصداع ؤلعناد ؤتهزت هزة
لمدرسة لي كانت تربي هرسها لوبي مشموت
سالت ريوقو على لربح و الريال وزادها غرزة
تاهت الناس والصبر ما عاد ذهب و لا ياقوت
كلشي معبس شاعل ، كيف ليلى وكيف حمزة
لفوضى ذبحت لقيم والدين بالنفاق والزفوط
شجعت على الانحلال ؤ جندات رهوط الهمزة
دنسوا النقا ؤ كواو لمحبة بغض وكره موقوت
تمزقت لبيوت ؤرابت ؤبالتفاهة المادة والحزة
فقاد ال لقيتي م تقاد ؤ حيد لغا لقبح ولغوت
يتلم الشمل ،وتفيض النية با المحبة و لمعزة
راه كاع لبيوت تهرست والحال عاد مزموت
فين غادين والطريق مظلامة و بالوهم مزيزة
وهي كاع لبيوت تشتات ؤ زاد ريبها لبهوت
ؤ نت زايدها في السخافة والخلاعة و الركزة
ففيق فيقي شد ف لمحبة وعشرة حتى لموت
ؤ لبغض لي زرعوه بيناتكم يولي محبة ومعزة
ليست هناك تعليقات:
إرسال تعليق