زجلية تحت عنوان:
أمالكم ؟؟؟
أَمالْكُم...
حَطِتوا سْلاحكم
آشْ طْرا لْكُم
ؤ في الظلام ضاعوا وْلادكم
ما كاين غ وْلَدْ ؤُ طْلَقْ
هذا مْخَنث هذا حْمَق
ؤ كَملتوا عليهم بِ هْبالكم
أ مالكم...
عادت الدار ساكتة غريبة
م بقى جمع ؤ مات الود والطيبة
ما بقات رحمة ؤ لْكياص عَمًر دْماغكم
راه الدرية الزينة من الصالحات
واحد باركا ؤحبس علمو ثْبات
لا تولد زينة م يأذيو الناس...
ؤ تْضُروا راسكم
سْقاطة وَذْلال
فَكًكْتو الصلة ربطتوها بِ مال ؤمال
نسيتوا سيرة جْدادكم
واش زعما تمدن ؤحضارة
وخا غلاظ جيبكم حياتكم خْسارة
ؤ من ذيك العقلية رُدوا بالكم
لْولد رافقوا ؤ صاحبو
لا تخليه غريب يخبط قْراقبو
يرحل موسم الغفلة...
ؤ يكثار صْراخكم
الحرية نُضج ماشي عادة
طًيْش هرًس بَحْجارو الإرادة
لا تربية لا اخلاق رَصْعاتكم
فإياك أصاحبي مَنْ المشتاق إلى فاق
والساهل م تْرَخْفو عليه يْوَلي تايه معاق
رْبَط تلقى م تَطْلَق ؤ يزيان مْقامكم
الوالدين بْجوج مسؤولين
إلى ولاًو لولاد معدومين
ؤ عَنْد الله تْجَزاو عْلى فْعالكم
أما في الدنيا غادين تفقدوا الهمة
م يبقى خير ؤتضيع كل غلة
ففيقوا ؤ راجعوا حْسابكم
اش ربحتي إلى عْواجو كْبادِك
ها الواشم ها لمقطع والراي م بقا رايك
تَهْزَلْ لبلاد ؤ تحرقها ناركم
غدا لبلاد من جيل تالف تعاني
ذاك راس المال خْسر في لالًة ؤ مالي
تْذَبْحَتْ لمحبة ؤ تْكسر جناحكم
أمالكم...؟؟؟
ليست هناك تعليقات:
إرسال تعليق