زجلية تحت عنوان:
زمان لفلاس***
في زمان لفلاس
ما تربي كبدة
ما تشدك غدة
ؤ ل فاتك خذا معاه لباس
لا حس لا أحساس
ذاك لي رد قلبو كديدة
ؤ عطاها للسريط و التغماس
في زمان لفلاس
عاد التين لعنطوط حاجة
يطفي الحق ؤ ينوض لعجاجة
نخرتو الأنا والوسواس
عاد قطعة منخورة
جمع كاع لخبث صدرو مطمورة
ها لغدر ، ها الجهل ...
ؤ صداع الراس
راحة لبال عماها جربوع
م يعرف صفا ؤ وفا عايش مخلوع
ممسوخ لا سر لا قياس
في زمان لفلاس
عادت لفضيحة والخيانة دين
قلب على بنادم والشر حتى لودنين
تخلطت ؤ ذابوا في الزحمة ولاد الناس
لي م عضكش بنابو ب لسانو يمرغك
جوج وجوه ب لكذوب يدبغك
حالو عليل الزواق والنفاس
فنوض أبنادم تقاد ؤ تعلم
قادر تصلح حالك ف غ صمم
دير الحب سفينة وكون غطاس
م تكون بهيمة ؤ غير غادي
عطي لعبرة ؤ قطع شر الايادي
ركب سفينة الرحمة والوداد والخلاص
في زمان لفلاس
لي بغتيه يسقيك سمومو
يتقلب ؤ يرخاص سومو
يديرك قنطرة...
او يتلهى بيك يا ولد الناس
لا تقطع امل لا تقول ما بقى خير
فك قيودك ؤطل والقلب كبير
ختار درب لمحبة ...
ؤ دير الصفا ولوفا اساس
في زمان لفلاس
ليست هناك تعليقات:
إرسال تعليق