سربة لعمايم...
بقلم: حميد النكادي .
تقاضا لكلام
عْيَات لعمايم
تْرَدْ حَرْ الصمايم.....
الصَّهْد تغلغل
بنادم وَلَّى هايم ....
فات الفوت
لِّي قطع الواد
راه فبحرو عايم
ؤُ لِّي حْصَلْ
راه على حياتو نادم ...
يا ديك الشمس الطالعة
حر الصيف
حرق السبايل
مابقا ربيع
تفرح بيه لقبايل .....
الدمعة ما تْبَرَّدْ
كِيَّة الجرح الطايل
ؤُ لِّي طاح حَمَّار خيمتو
ما يْواتيوْهْ نْوايْل....
عيات لعمايم
ترد حر الصمايم
وَلَا انت
حَرْكاتك النغزة
يا غافل يا بنادم
عَمَّرْ صيفك
لا وْلَّى شْتوا
إِلَا ما حَرَّكْتِي
خيول ريح لمواسم
تتلبد السما
بتراب السربة
و البارود يطلع غيمة
تصب تغسل ريوس
يفيق القلب النايم ...
فرنسا 7/7/2022
ليست هناك تعليقات:
إرسال تعليق