بشعر العامية المصرية .
--------------------------
( الجنيه راحت عليه )
الجنيه بيعوموه والدولار بيكرموه
والبنزين بيرفعوه والسولار بيسعروه
المواطن بيوعدوه من زمن وبيخلفوه
وف كل مره يسكتوه بالأمل ولا يقنعوه
والجنيه بيحيروه فاضل شويه ويخنقوه
الجنيه راحت عليه زي القرش بتاع زمان
والغني اسودت عينيه لما شاف الإمتهان
والغلابه تبوس إيديه طمعانين في البرطمان
خد في جيبك مية جنيه واشتري جبنه وألبان
واستلف لك ألف جنيه واشتري أكل الصبيان
الجنيه ليه مرمطوه ودقوا راسه في الحيطان
وعوموه ما بيرحموه خلوا سيرته ف كل لسان
نقصوه وقللوه وما يعرفوش كان يسوى كام
كان يجيب الوجبه طازه وجوز الهند والمرجان !
وكان يجيب لك كام إزازه زيت طعام وجوز حمام !
خلوا بالكم يا عباقره من صراخ الشعب مره
شدوا حيلكم يلا بكره واصنعوا يلا المسره
بالنشاط والجد يلا دي البلد أحوالها مره
أي واحد عنده فكره تخلي الحركه مستمره
إعرضوها ونفذوها دا كل فكره مفيده دره
وكل عالم من بلدنا يفيد بعلمه الطلبه بره
دعوه منا يعود لبلده ينشر علمه بكل جرأه
ويرفع دايما إسم بلده في المحافل ألف مره
وترجع للجنيه قيمته بدون مشاكل أو مضره
-------------------------------
بقلم د / عبد الرحمن فتحي الحناوي .
من مصر .
ليست هناك تعليقات:
إرسال تعليق