لما كنا صغيرين
بقلم: صلاح منير
بيشدني للماضي الحنين
لما كنا لسه صغيرين
والقلوب بيضا بلون الياسمين
والبراءة طلة من العنين
لما كان الحب عذري رسين
بأفتكر نظرات عنيك الخجلانين
وعلامات الحب على وشوشنا مرسومين
مع حمرة الخدود ورعشة الشفتين
لما كنت أنا وانت لقلوبنا مسلمين
ووردة متصبرة في كتاب بين صفحتين
ورسايل بتطير في الهوا بين شباكين
بالشبابيك كنا نقف لبرد الشتاء متحديين
كان دفا قلوبنا على شدة البرد معين
فاكرة رجوعنا من المدارس مروحين
كنا بنبقى عصفورين في الهوا طيرين
وكانت الناس بتقول دا حب مراهقين
واحنا بالحب العذري البرئ متمسكين
ذكرياته بقلبي عايشة رغم مرور السنين
ولسه بيشدني للماضي الحنين
لما كنا لسه صغيرين
صلاح منير
مصر
ليست هناك تعليقات:
إرسال تعليق