من وحي كلمات الشاعر الكبير Hassan Aboali وردا على قصيدته اتحداك
اتحداك
انت بعمايلك دية
بتصغر اوي في عنية
وغلاوتك في قلبي
بتقل شوية شوية
في هواك كنت ماشية
مغمية عنيا
وانت بغرورك
بتقسى عليا
فاكرني ملك ايدك
وهتحمل لهيبك
وحرضى اعيش
في ركن من
حياتك مرمية
اللي يسالك انا مين
ترد بعنجهية
وتقول دي واحدة
مابقاش ليها اهمية
ومهما عملت فيها
لاهتقدر على البعاد
دي ضعيفة مش قوية
بس دي اوهامك
لما تفتكر حبي
ملوش دية
وقدام الناس
تخلي حالتي
ميؤوس منها ردية
رسمت لي بالحب
في الاول بحور
احلام وردية
ولما حبيتك
حولت حبي
لمشكلة وقضية
كلامك معايا
كله خناق وخصام
بزعيق وعصبية
والمفروض اصبر
واقدم لك الولاء
و لحضرتك التحية
واعيش معاك عذاب
واحزاني تكون ابدية
وكل جروحي منك
تبان قدامك عادية
تتفرعن على قلبي
وابقى مكسورة
الجناح ضحية
راجع نفسك قبل
ما تندم عليا
لو انت مش قد حبي
ابعد ايه جابك ليا
راعي تصرفاتك او
اتحمل المسؤولية
بلاش تسرح باحلامك الغبية
وتفتكر اني اسيرة
عندك صبح وعشية
انا ممكن انساك في
لحظة وحتندم عليا
خليك حنين لمسة
ايدك سحرية
قلبك يحرك الحجر
من الحب والحنية
قادر بالحب تخليني
طفلة بريئة وشقية
ارجع زي ماكنت
حتلاقيني بضفاير
واحلام بنوتة صبية
عايشة الحلم معاك
زي الحمام وانت الغية
ليست هناك تعليقات:
إرسال تعليق