==== غير رزقك مفيش ====
كانت قروش وصاغات
نجيب بيهم حاجات
دلوقتي ياولداه
تعمل إيه الألوفات
حضرنا اللحمة بتلاته
وشرينا العجل بميه
وكان الألف جنيه
دول مهر البنيه
وكلنا وشربنا ياما
ويقولك .....
خلي الباقي عليا
كانت طيبة ونهيبه
والخير في كل حته
رحت السوق تجيب
رحت الغيط تجيب
والكل ف الدنيا سويه
الدنيا كانت عجيبة
كنا نحمد ونشكر
مع إن القبض قروش
والرضا مالي الوشوش
دلوقتي ....
الطمع أصبح ملينا
وعمره ما في يوم يسيبنا
والكل من بكره خايف
مع إن نصيبنا يصيبنا
ياعم سيبك وكبر ...
في بكره أوعى تفكر
ربك هوه اللي دبر
لكل الخلايق تعيش
غالي رخيص ميهمنيش
الدنيا ماشية ودايره
هتاخد منها ياعمي
غير رزقك منها مفيش
بس أشكر وعيش
بقلمي
صلاح شعبان الفيداوي
القاهرة
٢٨/١١/٢٠٢٢
ليست هناك تعليقات:
إرسال تعليق