باللهجة العامية الحلبية
حَنِّيتِلِّك
----------
حَنِّيتِلِّك
ومِشتاقْ كتير كتير
مِشتَقلِك ورايح جِنْ
قلبي مِدري اش صابو
مِدري اش صرلو
لَما سِمِعْ اسمِك صار يِعِنْ
لَكْ هَيْ حلب
ياعالم ياخَلق والله مِشتاق
والله مو بإيدي
مِتل الوَلد يَللي لأمّو بْحِنْ
شلون أنا وأمِّي بعيدة عَنّي
وأمِّي بحلب وأنا عَنُّن بعيد
اش أساوي وقلبي عَمال يِزِنْ
لَكْ ازا هبّ الهوا بَزَّكَّرا
وازا مال الجوري والياسمين
و بَزَّكَّرا ازا هبِّت ريحة البِنْ
لَكْ هَيْ حلب
اشْ أقول لَقلبي وماتَم فيُّو صبر
وذكرياتا لَكِل شبر نغم بفكري عَبْرِن
والله انكَوِيتْ
وبنار الفراق احترَقْتْ
قلبي مِتِلْلّرْغيف اللي نسُو بالفِرِن
مافي مين يطالعو
لَكْ حتى الفرن انهدم
وصار مَلفى للأوهام والجِن
وأهل الفرن كِلْ واحد صار بديرِه
يللي مات
ويللي احترق
ويللي غِرق
وقصص من هاد وهاد وقصص عَن
وصرنا قصّه
فيا ألف غصّه وغصّه
والكون مع انُّو كبير
فيُّو ألف عصَّه وعصَّه
وما خلصِتْ المِحَن
ودارت الايام
وطالت الأوهام
وكأنُّو الزمن مو هُوُّ الزمَن
وأنا قلبي ماتغيَّر
وهُوُّ رماد عَبْيِنْبُض بالحب
لأنُّو حلب هي أم الخير والمَن
لَكْ ترابا دهب
وأهلا دهب
واسما دهب
لَكْ سورية كلا دهب
لَكْ خيُّو هَيْ حلب
بس ياحيف خربوا كل شي فيا
ياحيف
خربو التاريخ والحضارة والأدب
خربو الدين والأخلاق والفَن
لَكْ صرت أشتهي ترجع لو بالمنام
لَكْ اش أساوي حبا بدمِّي
وهمَّا همِّي
ولدت فيَّا وشَبِّيْتْ وشِبْتْ
لسَّاتني مِتل الولد يَللي لأمو بحِن
والله مَوْ بإيدي
هيك أنا
ياعالم ياخلق بحبَّا
لك شِفتي بإسما بْتِنتِشِي
و لسيني بنوّر بحروفا والسِّن
لا حدا يجيدلني بحبا طاول طاول
لأنو حبا بقلبي ميكن ميكن
هِيّا مِتل أمِّي
وأمِّي عَلَي الأحَن
لَك كِل شي فيني بزِكرا بيرقص
هيك الله خلقني
بحبا لأموت
وطول ما أنا عايش
ولإيخر نَفَس فيني
بحنللا بحنللا بحن
ليست هناك تعليقات:
إرسال تعليق