زمان الشناقة***
لعجرفة ؤ طرطقة
زوق تبيع ،الزعيت والنقنقة
مضغ مضغ والشناقة
لخش غطى لقمح
كلامو خاوي ملح
بلابلا ؤلعياقة
ذاك طبع الخاوي من سبول الكدية
تهز علي نتهز لْعليك وَش ؤ لكيدية
سي سيد أبو التسمسير ؤلكرفطة
أما التواضع ؤ لبساطة
من طبع العامرة الحانية...
لي بالخير غداقة
هباب لعافية
رماد الطافية
ؤ دخان لحداد ما تشعل حريقة
بكري قالوا الساهل ف لبقر قيدو
ؤ لباز م هو فريسة باش تصيدو
ؤ الدفلى دفلى ولو تزوقها الف عقيقة
لخاوي الى ركب لكافلة ضرو بلا حدود
يولي عليها فارس بلا تبوريدة بْلا عَوْد
ؤ م يعطيها غير لغم الحافي والضيقة
الظنون سكنات لقلوب الراشية
تفقد لون بنادم ؤ لعقول طايشة
كذب علي نكذب عليك والنفاق لغة المراقة
لبيوت رابت لا محبة بقات لا حنان
رجل تلف خرف ؤ حط الدوزان
لفراخ عادوا نسورة شمكارة سراقة
ف فاش قل لي نفعاتك لفياقة ؟
اما انت ي لالا ؤ يا راس الخيمة ؤ لبلاد
مالك وليتي حايرة بايرة بلا وتاد
زير زير جوج وجوه والصباغة دراقة
راه بالعفة يَتْصان لعرض لا ب لفضيحة
ذيك ل ركبتيها ماشي لخاطرك غ ذبيحة
كوني نت بالحرف ؤالعلم ولحشمة ؤ لحداكة
فارجع يا بنادم فين غادي
شد في الأصل ؤقول فخري بلادي ؤ ولادي
دير القنعة راس مالك ؤ نسى شداقة
شد في الصح تعود لمروة
تنبت لمحبة الصادقة ؤستر لعورة
تزول من النفوس الوسوسة ؤ لفياقة
أما تقمص الدور والطرطقة
ؤذيك الصورة المزيفة ل ليك مْرافْقَة
كويها بالصدق ؤ لوفا
اختار بلا طمع ؤرضا
ركب لمعقول ولمحبة ،الحشمة والبساطة
زمان الشناقة
***الزجال والشاعر : أحمد الكندودي***المغرب***
ليست هناك تعليقات:
إرسال تعليق