بشعر العامية المصرية :
(حوار بين الجنيه والدولار )
الجنيه :
أنا سيد العملات من زمن عدي وفات
وكان ليا ذكريات بين أكبر العملات
سعري كان بيساوي مجموعة دولارات
والحال فضل ماشي لا شده ولا أزمات
الدولار :
إيه خلاك تنزل كده وتحصل الأموات
أنا عندي حكومه مؤيده للشعب بالقرارات
رفعِت قيمتي للسما وبالنسبه لك بالذات
لا عليا قروض ولا سلف ولا هدْر مشروعات
الجنيه :
انتا السبب في الغلا رابطني بيك ليه
خلتني اشوف البلا والشعب ذنبه إيه
كل انتا ما تعلا أنا انزل حكايتك إيه
يا دولار فاتت سنه العدل فين أراضيه
تعبت منك انا خفضت قيمتي ليه
الدولار :
حكومتك مش حكومتي غرقانه في الديون
حكومتي رفعت قيمتي في كل دول الكون
حكومتك لو منتجه سعرك يبان مضمون
لكنها بتستورد لا رقابه ولا قانون
الجنيه :
مش عايز نصايح منك ولا عايز موعظات
انتا خليت البلد موجوعه بالقرارات
وخنقت شعب صبور بالشده والأزمات
مش َممكن اطمن لك ولا حتى للسياسات
الدولار :
طول عمري رافع راسي بقوة الكيان
وبنك بلدي مخفض أسعار الائتمان
ومسيطر عالتضخم وكلامه بالميزان
وَرقابه عالأسعار ساريه في كل مكان
الجنيه :
لحد كده وكفايه غدرك واخدنا فين
يا دولار كنت مرايه للعمله من سنين
صندوق النكد الدولي شادد وما بيلين
فارض شروطه علينا وعايزنا له مطيعبن
الدولار :
أنا سايبك ورايح ادور على ناس بتعرف قيمتي
على عمله قويه تنور وتحسن شكلي وصورتي
وقَّفوا بسرعه القروض نفذوا يلا مشورتي
ووفوا بكل الوعود وخدوا يلا بنصيحتي
الجنيه :
كنت عايش سلطان زماني وانتا بتسف التراب
كنت حارس عالأماني والهنا ورا كل باب
كنت بجهز العرايس ومهر وتحويشة الشباب
ويوم ما دخلت بيتنا ابتدت رحلة عذاب
بلّغ أسيادك نصيحه سجلها في كل كتاب
؛تخطيطكم بالسوء فضيحه وانكشفت لنا الأسباب
نفسنا ف عيشه مريحه تعوض أيام العذاب
اتركوا بلادي لحالها جبتوا للناس الخراب
---------------------
بقلم د / عبد الرحمن فتحي الحناوي.
من مصر .
ليست هناك تعليقات:
إرسال تعليق