زجل مغربي بعنوان: دار الزمان
بقلم : فدوى گدور
فداك الزمان...ملي كنا صغار
كانت الحشمة....وكان لوقار
الرجال راسهم عالي...احرار
النسا...الهمة والشان...الزين الفتان
لباسهم الجلابة... الحايك أو يزار
قالو الناس الكبار:
بعد على القيل والقال
لا تكذب لا دير يدك فالغار لا تجبد عار
إلا بغيت تشرب صفي...قصد العين ولا تحتار
خوك البعيد او القريب بحالو بحال الجار
احترم الصغير قبل الكبير لا تلبس جلابة الحگار
الثرثار عطيه النخال ....
الا شفت قول ما شفت الا سمعت قول ما سمعت
تعيش هاني عمرك تندم ولا تنهار
لا تصاحب الاشرار ...لا تعاشر النمام فاضح الاسرار
لي يحكي ليك اليوم ....يحكي عليك غدا
لا تكون غافل رها كتبدل الادوار
لا تقنط..لا تستسلم ..كن قوي وصبار
دار الوقت ودار ...ويا ريتو مدار
شفنا العجب وسمعنا شلا خبار
بنادم جهل جاه الهبال قاسو السعر
الدجاج كيسرح بالليل...والكلاب تعس بالنهار
الذياب كتعرس كل سبت وأحد
بلا موجب شرع وبلا قرار
بلا حيا بلا حشمة وبنهار گهار
مكاين غي طبل والنفار
المرا ولات هي الري هي شوار
كلشي خدام حتى لي جالسة فالدار
كاين روتيني اليومي وبزااااااف ميدار
تهز وتحط ...تلف ودور ...وهاهي ولات سطار
بالميكاب والسناب تيقت راسها ملكة الجمال
داك المنافق الغدار مدعهما.... منورة يا قمر
كشرات على نيابها ..تباهات بعضامها
يا ربي يا ستار ....اللهم هادا منكر
اللئيم و الشفار هما المطورين
يستاهلو جائزة اوسكار
الصادق الأمين كينعتوه بمكلخ الدوار
السفاهة ولات شعار غي بالوش تربح مليار
وانت خدم ليل ونهار الا شريت الزيت تكردي السكر
مهم بلا مزيد نفرگع المرار
كلشي ظاهر على ظهر الحمار
ولخبار دبا يجيبها العطار حتى لباب الدار
وياربي منكونش تعديت العبار
غلقت وكثرت فالليبزار،🤗
ليست هناك تعليقات:
إرسال تعليق