ماتتكبر...(زجلية بالعامية المغربية)
بقلم : حميد النكادي ..
مْشيتْ نْطَلْ
ؤُ نَضْرَبْ لَفْكَرْ
نْشوف آشْ طْرا
وَاش تغير ...
لْقيتْ السبولة
الذهبية خْواتْ
والْحَبْ كْلاهْ
فَرْخْ الطِّير ..
خاوْيَة تْصَفَّر
ؤُ مْعَلْيا رأسها
بْلا حَشْمَة تَتْكَبَّرْ
حَالْ شَلَّا ناس
دَرْنا لِهُومْ قيمة ؤُ شَانْ
حسبناهم رَزَّة ؤُ عْمامة
كِي جَا المعقول
لقيناهم كيف النعامة
يْخَبْعو روسهم
والكسدة تَبْقا عَرْيَانة
صَفّي ؤُ شرب
راه الدنيا زربانة
والله ما توصل
إلى ما عطاك مولانا
شوف البكمة
تخرج جيعانا عطشانة
ؤ ترجع لعشها شبعانة
والنحلة تطوف
بين الزهور الفتانة
يخرج من ذاتها
دْوَا ذكرو مولانا
من قال للنملة
قسمي الحبة شطرين
باش ما تنبت ؤ يولي
العش كغابة مليانة
اتق الله يا بنادم
ما تتكبر اجلس معانا
الأرض ليا ؤ ليك
من ترابها تخلقنا
وفيها قبرنا فيه
نَسْتَنّاوْ رحمة مولانا ..
ليست هناك تعليقات:
إرسال تعليق