بشعر العامية المصرية .
( حوار بين حارس وناشط )
١- الحارس :
اوعي تفكر ترفع راسك
ولّا تقول كلمه ف كراسك
احنا بنحمي الشعب وناسك
خليك ماشي جنب الحيط
الناشط :
إنت عايزني اسكت على طول
ما اتكلمش ولو بأصول
ولا اعبر عن رأيي واقول
ماتعودتش كده في البيت
٢ - الحارس :
اوعي تفكر في الحريه
اوعي تعكر صفو الميه
ممكن تلبس ألف قضيه
خليك ماشي جنب الحيط
الناشط :
انتا عايزني جسد بلا روح
آكل واشرب واجي واروح
واقفل بقى عن المسموح
ما تعودتش كده في البيت
٣ - الحارس :
اوعي تجيب سيرة أزماتك
أو تظهر للناس صدماتك
عش بأمان انتا واخوانك
خليك ماشي جنب الحيط
الناشط :
هي دي عيشه تخلي الدنيا
لما بتحلا تكون حاجه تانيه
انتا عايزني أهتز ف ثانيه
ما تعودتش كده في البيت
٤ - الحارس :
اهتف اهتف قول يازعيم
وانتا مسافر وانتا مقيم
حسك عينك تبقي لئيم
خليك ماشي جنب الحيط
الناشط :
ياما هتفت وقلت كلام
كله حقيقه ومش أوهام
لكن حد يقوللي بكام !
ماتعودتش كده في البيت
٥ - الحارس :
اوعي تفكر يوم تتظاهر
أو ترفع يافته وتتفاخر
الثورات دي بقالها آخر
خليك ماشي جنب الحيط
الناشط :
ليه تحرمني وتهدر حقي
في الوقفات وتسفه رأيي
مش هاسمح لك تقفل بقى
ما تعودتش كده في البيت
٦ - الحارس :
خليك عارف بس حدودك
ارفع راسك واصلب عودك
مين هيحقق كل َوعودك
خليك ماشي جنب الحيط
الناشط :
أنا عارف أنا بعمل ايه
أنا خايف على وطني ليه
شايف حزن وفقر ماليه
ما تعودتش كده في البيت
٧ - الحارس :
بص وشوف الإنجازات
ليه عينك عالسلبيات
حواليك اكبر مشروعات
خليك قاعد جنب الحيط
الناشط :
عايز احس بعيشه كريمه
من غير ذل وقلة قيمه
ولا صوت واحد فارضه علينا
ما تعودتش كده في البيت
٨ - الحارس :
لازم نكشف كل عميل
كاتب وما يملكش دليل
عايش تحت ظلام الليل
خليك قاعدجنب الحيط
الناشط :
حاور ناقش اعمل حاله
ما تفتش في كل مقاله
ولا تتعقب كل رساله
ما تعودش كده في البيت
٩ -الحارس :
لولا القوه ما كانش الشعب
ولا إحنا خطينا الصعب
خلصنا على بث الرعب
خليك قاعد جنب الحيط
الناشط :
اتعودت أناقش والدي
واطرح فكري واقول رأيي
من غير خوف وبنيت نفسي
عالحريه جوه البيت
------------------------
بقلم د / عبد الرحمن فتحي الحناوي.
من مصر.
ليست هناك تعليقات:
إرسال تعليق