( باللهجة المحلية )
تِخمين
******
- تِخمين عرفتها ...
و عرفتها من سنين
حِلوة و دافي و معطّرة بياسمين
- قالت : اكْبِرِتْ ...
قُلت : تِخمين ..صغيري و جاهلي
وما بتعرف التِخمين
- تِخمين جاي من الفضا
أو يمكن من عصر و مضا
ويمكن إجت ...
من بلاد الصين !!!
- وجها متل صُبح انبلج
و خدودها ورد بثلج
وعيونها سود ملوّنين
- واهدابها شوك الشناديب
والنظرة طلقة صقر .. ب مِغلاق ذيب
و .. بلهب تنّين
- والمبسم غافي عَ الثغر
مَسْبوك من عاج و تِبر
رِقّة و دَفا و طِيب .. و حنين
- و شفافها بتقْطر ندى
عََنقود مْشبّع بالسّدى
والخَمِر فيها .. مْعتّقين
- و اسنانها حَب البَرَد
و الدمع غِيم و عَقَدْ
والقمر لالا .. عَ الجبين
- و الشَّعر يا جناح المَلك
بكل خُصلِة بحور و فلك
تاه فيها نوح .. بفلكو المتين
- و الجيد يا عنق الغزال
والشعر ليالي و شلّال
و بالنجوم مرصّعين
- والنهد طَلعِة فطر
مْزيّن برمّان و عطر
بعنبر و مسك .. مهجّنين
- و عناقها وْجاق الحَطَب
مْسعّر بنار و لهب
بيدفي ب صقعات كوانين
- و الخَصِر صِينيّة خزف
لو مال خَرّ وَ زحف
فيلق من الساجدين
- و المشية طلخم نعام
بالهيدبى يميل القوام
إمْشي الهوينى .. تْرفّقين
- و الأنامل بُرعُم خيزران
منقوشة بريشِة فنّان
من الوما تْشُق الوتين
- تِخمين الغيم اللي ب السما
زخ ببستانها و رما
تفاح و كرز ..
و عَقْدِة كُبِش تِين
- و تخمينها حْكايِة أزل
و ملحمِة عِشق و غزل
و دوريِّة بردانِة
تزقزق بتشرين
- تِخمين و تِخمين
و كل العُمر تِخمين
بس الحقيقة كانت
طيف و خيال سنين
ليست هناك تعليقات:
إرسال تعليق