زجلية : جذبة بوهالي
============
نجذب باسم العالي
ونزرع في الذات دوالي
نعصر شرابها
حكمة وجذبة بوهالي
شجرها في ظلام الكون
يسبح ويلالي
ودواها ترياق
وترياقي دواية ما تسالي
تكتب فالاعماق
سرار الكون
كيف الما يكتب
طريقو بلا عتالي
يسقي جذور الحكمة
ويمزﮒ حجوب العلالي
الجذبة خيرها
في خير ناسها
كيف البحيرة
حافظة غراسها
والمجذوب بلا حيرة
مجذوم بشوك الحكمة
ما يعرف راسها من ساسها
سولوه علاش سمانا
حبست نفاسها
علاش بنادم يعيش
في القهرة يشرب كاسها
حيث مالقى قدرة
ما عرف قياسها
وأنا نقول حيث الحصيدة
ما تخضار إلم خضبها ترفاسها
والتمرة ما تطيب
إلماَ نقشها فاسها
وحبة الزرع تلين
في يد غرّاسها
الصابة ما بقات صابة
حيث ما بقات ڱاعة
ما بقاو درَّاسها
والمناجل صدات
ومابقاو حَصَّادَا يْحَسْبُو
سنانها وضراسها
عشور المسكين
ولا دين فرقبة الفلاحة
عند الله ياخذو خلاصها
والدنيا تدور
نهار تعطيك زرع
ونهار تطليك بغياسها
واهيا زماني علمني
كيف نربي نفسي
كيف نحفر لها ساسها
كيف بالحكمة نَشْغَلْهَا
تْقَلَّبْ عْلَى ضَيْ نَبْرَاسْهَا
إدريس بندار.
ليست هناك تعليقات:
إرسال تعليق