زجلية تحت عنوان :
آش طرا لينا***
آشنو لِ تزاد...
وآشنو لِ تبدل فينا
كانت لمحبة وصية
ؤ دسناها برجلينا
واش نسينا
او هو الوهم في التلفة...
غاص بنا
ما بقات رأفة
دفا ؤ لعفة
ؤ ف لمكر ضاع كاع ...
ل بنينا
آش طرا ؤجرى يا لغافل
راك وحيد تالف جافل
ؤزادتك قسوة لمدينة
الضحكة ذبالت ؤتصدات
جثت متحركة عمات
والأنانية خرجت علينا
وصاونا نردوا من بعضياتنا البال
لا ثقة زعما بقات كلشي رجع محال
طيحونا ف الفخ ...
ضاع الجمع ؤ الظلام طاح علينا
الصلة ب لمناشر قطعوها
لخاوة للغريب باعوها
ؤ بالخبث سبلو عينينا
لا رحمة بقات لا وداد
راسي ي راسي فجف لواد
رابت العشرة والألفة...
ؤ مات الحس فينا
فيا دنيا الزحمة والغمة
ذاك الانسان راه فيك تجلا
غرقت سفينتو ؤم نجينا
أش تزاد عليك نت ؤ نت
ياك غ لمظهر ل كسينا
الداخل رمانة يعلم به الله
هو الوحيد الكاشف برضاه
ؤ بالنفاق ؤتحراميات تبلينا
نفرحو الى تقاس الخو ؤ نتشفاو
ذياب بوجهين أش بقى م نترجاو
ولينا نتسلاو بألم وأنين بعضينا
فأشنو لِ تزاد
وآشنو لِ تبدل فينا
ياك حنا هما حنا
او زواق تَلًفْ نبع منين جينا
ليست هناك تعليقات:
إرسال تعليق