قصيدة زجلية غنائية @ للغاليين أجمل هدية
عس على لسانك
خلي لسانك ديما مزيان
ما مخبي فكلامو خديعة
سعادة تزهو تمشي نيشان
تفرح و تسعد كل جماعة
يسكنكم الأمن و الأمان
تنالوا فحياتكم منزلة رفيعة
لسان لحلُو يقرب لبعيد
يخلي لمحبة صافية تكبر
بين لقلوب لعلاقة تزيد
و لود بناتكم شحال يكثر
جو لعشرة ما يبقى مريض
و عليكم يغيب كل ضر
طهارة لسان نغمة عود
تعزفها يدين مبدع فنان
تخلي لماضي لجميل يعود
يحيي معاه ذكريات زمان
لي راحت ما بقات ليها وجود
لا ليوم نسمعو بمثلها ألحان
لسان طيب هوى عليل
يرجع لكل مريض راحتو
بيه لقلوب تفرح و تميل
ما تسخى تفارق ساحتو
عسل من شهدة تيسيل
يهجي بطيب ريحتو و حلاوتو
لسان نقي بحال لمَاء سلسبيل
يجري فسواقي يسعد لطيار
شكون يسخى بلحنو لجميل
تابت ما يعرف يفشي سرار
ما تكون علحب و لود بخيل
تصبح نت و لسانك من لخيار
الشاعر و الزجال الغنائي و القاص
ليست هناك تعليقات:
إرسال تعليق