،،،،،،،،،(على فين يابلد)،،،،،،،،،
الناس بتاكل بعضها
في الغلا كان حلها
كل واحد علا' سعره
نار تقيد ماهمها
دنيا رايحه ياناس لفين
أسعارنا نار ع المرتاحين
والدموع نازلين بفعله
صوت بكاهم جاب أنين
كل يوم أسعارنا طالعه
سوق وفيه الدنيا ولعه
والزبون مكسور له ضلعه
والتجار مفيش ممانعه
سوق وصاحبه لسه غايب
كل واحد خد له نايب
والفقير بيبيع في ضلعه
بس عايش وحده خايب
لو يعيش هيجيب منين
والحياة عايشها دين
والعيال في البرد قلعه
لجل مغسول هدمتين
مستحيل يلبس جديد
حتى لو شغال حديد
شغله مش هيكفي سلعة
مستحيل هيعيش سعيد
يعني لو محتاج تعيش
لو هتاكل بس عيش
محتاج لشغله بالألاف
وياريت تكون شغلة شويش
علشان تلبس عيلين
بالجنيه يادوب ألفين
وبلاش هيكلوا عيش حاف
أو يمرضوا أو يركبو كدا مرتين
وبلاش تجيب م اليوم دا غاز
وبلاش وابور لو حتى جاز
وبلاش يكون عندك لحاف
ولاشئ بيولع في الجهاز
تعبنا واتجن الجنون
وقلنا بكره أكيد يهون
لقينا بكره منا خاف
وكله أصبح للظنون
مين ياترى يقدر يعيش
بقينا طير منزوع له ريش
وعمر اصبح في عجاف
والموت كمان عملولو فيش
السادة نسبة كتير قليله
والباقي صعب يكون له حيله
عبيد وفي آخر المطاف
الأكل هيكون م النجيله
صبرنا وبعد الصبر مر
وفطرنا بعد صيامنا شر
ولا حد م السادة شاف
قوانين علينا يادوب تضر
السرقة صبحت شئ مخيف
وحرامي بقى يسرق ضعيف
حتى الجواز لشبابنا عاف
في الحرام أصبح خفيف
الفقر عشش ع البيوت
والخوف ماهتوفرش قوت
في السوق هنشتري اللي جاف
ومفيش هيطلع لينا صوت
أنا خوفي أصبح خوف كبير
كان نفسنا في المستحيل
الفقر لف علينا طاف
وإزاي هتبني بالفقير
من هم اصبح فيه هموم
ياحكومه بنصوم كل يوم
بإيديكو الفقر علينا لاف
وخلاص بنبيع في الهدوم
نظرة ياناس العدل فين
أسعار وشاب فيها الجنين
على كتفنا بإيديكوا ناف
في الساقيه أصبحنا هجين
بنلف فيها بالألاف
علشان نعيش لو كدابين
لما المرض علينا لاف
أصبحنا عاله ودا الكمين
،،،،،،،،،،،،،،،،(شعر)،،،،،،،،،،،،،،
ليست هناك تعليقات:
إرسال تعليق