بشعر العامية المصرية
( قفلت في وشه الباب )
قفلتْ في وشه الباب
وقالت عليه كذاب
والشاب كان بيحاول
يحميها م الأغراب
النيه كانت سليمه
والدنيا نصر وهزبمه
ولُولا حبة عزيمه
كان شعره بدري شاب
القلب أبيض صافي
عمره ما كان بيجافي
لكن لسوء حظه
خد له شوية عتاب
الصدمه كانت عنيفه
والشده كانت مخيفه
ولاجل روحه اللطيفه
شاري وعمره ما ساب
ما تظلميهوش معاكي
دا جي طالب رضاكي
اديله فرصه بهواكي
يرفعك فوق السحاب
الحب مالي القلوب
وبيخفي كل العيوب
لو بس ناوي تتوب
نفتح لك ألف باب
الحب مش بالعافبه
ولا الأمور خافيه
محتاج قلوب دافيه
تبني ولا ترتاب
حبيبي ما هملنيش
لكن ازاي ما يجيش
فارشاله الأرض حنه
وحرير اتواب اتواب
لو جالك حتعملي إيه
لازم تبوسي ايديه
و تظهري حبك ليه
قومي افتحيله الباب
فتحت لروحه الباب
وقالت دا عَز احباب
حبيته ومفيش غبره
والباقي بره الباب
يا ست يا مصريه
يا صابره يا مثاليه
الغرب جي بعاداته
احذري ميل الشباب
-------------------
بقلم د / عبد الرحمن فتحي الحناوي
من مصر
ليست هناك تعليقات:
إرسال تعليق