/ الخبز للجميع
------------------/
( ليس الفقر عيبا بل الجهل هو العيب ، عندما نعرف حياة
الآخرين نعرف حياتنا و نعرف حب الغير. بالحب نبني كل
السلم والسلام شريطة أن نحب للغير ما نحب لأنفسنا....
الخبز للجميع.! )
-- قالوا اكبير الكرش تتفركَع ليه --
(زجل)
ابكيت على ليٌام اللٌي افرحت فيها.!
واضحك على ليٌام اللٌي ابكيت فيها.!
* ارجعت انخمم بلا تخمام!
ما انفعني تخمام
ما نفعتني اندامة
مرة انجر الدنيا و انزيد
مرة اتجرني ليها تمنعني
مرة نزعم نركب عليها
انقول غ سيري سيري
مرة تركب عليٌ طالعة
* هذيك هي لفضيحة.!
مرة نحكي ليها ضيم
نحكي ضيق الحال.!
ما تسمعني اتقهقه هيٌ
تضحك تمشي واتعدي.!
مرة تحكي ليٌا
بالخوف
نسمعها نبكي.!
ويلي إلى اقلبت الطرحة
والفران اسخون لهيبو.!
ياتيني الصهد من كل جهة أنعود عرقان.!
يا من كَعد اوسادي يا من كان لي اعوين.!
ويلي على اعجب شافتو عيني واخلات.!
عشتو ابقلبي لحنين
صياح و انواح دايم
عشتو بالقلب الدامع
ادموع وديانها
قطعت لفيافي.!
* قلت لو : يا ايتيم ليك الله.!
اركبت االخيل بلا خيل
اجبرتها حمير زعرااطة
ارجعت للكلخة والعادة
* هدٌاوي لابس دربالة
مجدوب كلامو ميزانو.!
اعرفت الحلقة أو لحلاقي
اعرفت الزنقة و الزناقي
اعرفت اللٌي امشي
واعرفت اللٌي باقي
و اللٌي في صدري سر مكتوم.!
* أعوج امكتف طالب
اشفاعتك يا رسول الله.!
أجبرت.........العلاٌم براح
المحرك سدرة واحفاري
واللٌي حرك يعثر ايطيح
اقريت فاالجامع بلا جامع
أجبرت لفقيه افقيه جاهل
الطالب يقرأ امتلف اللوحة
والقوم جاهل لا عاق لا فاق
حركت اسوارت الرٌباح بلا ارباح
وابقى سعدي سعد نايم ناعس.!
قلت العاطي الله نصبر
رزقي من عندو..ياتيني
إلى اعطشت نروى بلا ما (ء)
إلى جعت نشبع بالخرطال
والشعير شوفي كيف ردوني.!
* قالوا :
خيرنا اكثير عكَدعوه.!
بميات سريفة أُو سريفة
من تحتي وزعوه اوزيعة
الباقي فيها حقكم خذوه
قلت نخدم انعول على اكتافي
اللٌي اخدمتو بالنهار يديه الليل
ما ابنيت ما عليت
ثمن خبزة غالبني
امولف القهرة أمولف قلٌت الشي
حب الناس وحدو ساكن اقليبي
علمني و اتعلمت منو الصبر الكافيني
الآمل فالماجي اعليه انقلب باشفاري
فينك يا .سلم.؟
فينك يا سلام.؟
* حثى نشبع وانفكر.!
( أرى أن جذور السلم و السلام هي القناعة وحب
الإنسان للإنسان سأظل أكرر هذا على الدوام.!
اقول واردد شريطة الخبز للجميع.!)
ذ/ العابد عبد الرحيم : 20/09/2022
ملهمتي الفقيه بن صالح علمتني الحب
ليست هناك تعليقات:
إرسال تعليق