وين العرب ....بقلم الشاعر كريم الزيرجاوي

 (( وين العرب )) قصيده بالشعر الشعبي العراقي

"""""""""""""""""""""

افتح عيونك يبو كلب الكبير

.وشوف شنطاك الجليل من النعم

اول الايات نزلت عل رسول

..............كاله اقره وتعلم بالقلم 

علمه الاخلاص والود والوفاء

...... وعلمه الاخلاق والعز والكرم

خله بالقران دستور الحياة

......ومن اجل دينة تحمل كل الم

خله بس التقوى نيشان الاصيل

........كلها يك حساب سيد وخدم

وعلمه بيوم القيامه الكل سواء

.............يوم لاينفع توسل لاندم

وعلم الانسان مامعنى الحياة

.........وخله للاطيار اشجان ونغم

وجعل من الماي كل شي بالحياة

.....وفائده للناس من فضه وفحم

وخله للميزان قسطا وعيار

..........وخله للدوله قوانين وعلم 

وجعل بالاسلام اركان السلام

....ومن يسلم الناس من ايده سلم

وجعل للناس الائمه الطاهرين

...........منهم اركان الهداية والعلم

كانت الدنيه ظلام في ظلام

........وخلق الانسان من نطفه ودم

جعل الشمس نهارا للعباد

..............بعد ماكنا خباء في عدم

واستباحوا ماخلق رب العباد

.......ومن كثر الرذيله اسلامنا تثلم

سكت ابن الشريفه اليوم

.........وابن الزانيه مهيوب يتهجم

خير امة جعلنا الله بالاكوان

.......ومن نهج البلاغه الناس تتعلم

احنه الي نشرنا العلم بالعالم

..............تاليها علينه الامم تترحم

كتاب الله بالعربي نزل ياناس

.....واحنه بكل وكاحه صرنه نتقسم

حاربنه الرسول وعترته الاطهار

.......حاربنه المباديء للنبي الاعظم

واخذنه من الغرب كل الردائه البيه

.....والابيض العدنه انريده يتصخم

ياهو الي يجي يركب اكتاف الناس

.....واليحجي بوطن منهم فلايسلم

سكنوا بالملاهي انعاف بيت الله

...........ولابيهم شريف بيوم يتندم

عصابات ودجل صارت باسم الدين

..واذا يوجد شريف بسدهم اتشرذم

وابن الخايبه يشوف الجزع واللوم

..........كل ساعة التمر ينعصر يتألم

وعدنه رجال عين الشمس تحجبها

..........لكن ينذبخ لو خطوه يتقدم

بس عدنه شعب بالله شابع نوم

...........كاظيها خدر بالامل يتحلم

كاظيها فقير وخيره فوك الخير

..........والحاكم رفاه بخيره يتنعم

العده داست بالبطن ياحيف

.......واحنه لاابالي من الجبن انعم

هاي ارض العراق اشتعلت بنيران

........طايح بيد ظلام أبد ما ترحم

يوميه ذبح تفجير كوم امراض

..........ولتمت عليه الاسود واقجم

ابو النهرين عطشان وشحيح الماي

..وكمنه نخاف من هذا الهوى نشتم

كمنه نخاف شرب الماي ياهل ناس

........بياساعه وعلينه الماي يتسمم

تفتر بالزبايل ياشعب موحيف

.......مامليت من جور الوكت والغم

الاقصى الحبيب انداس بالرجلين

.......وفلسطين الأبيه مهدله وتلطم

ماالها نصير تصيح ياول غوث

.......وماادري الشهامه بياكتر تنظم

سلبوها عروس من العرب ياحيف

...ويهودي الي نزع شيلتها يتشمشم

وسوريه الحبيبه تروح بالرجلين

.........اريد اسأل ليش الشام تتهدم

والبحرين مجروحه وتون ياحيف

...........محد بالعرب شو كام يتكلم

وذاك ابن اليمن مذبوح بالصوبين

.............يردونه يذل للنايبه مرغم

كافي ياعرب موعيب صارت هيج

.......ترادت والوكت هيهات مايرحم 

@ كريم الزيرجاوي @

""""""""""""""""""""""